((نقل فؤادك حيث شئت من الهوى
مالحب الا للحبيب الأولٍ
كم منزلٍٍٍ في الأرض يألفه الفتى
وحنينه ابدآ لأول منزلٍ))
هل بإمكان اي منا أن ينسى حبه الأول.....كنت اعتقد أن الحب الأول هو عبارة عن حب مراهقة لا اكثر......حتى جاء ذلك اليوم.... (دن دن دن دن دن -موسيقى تصويرية- دن دن دن دن) (السسبنس مهم)
خلونا نبدا من البداية.......... والبداية تعود الى ## سنة خلت (ماله داعي تعرفون كم)
كانت الساعة تشير الى الرابعة عصرا....في عز القيض...حتى الطير مايطير... بس نحن وكالعادة لعب كورة من الظهر لين عقب صلاة المغرب.... يتخللها عدو سريع جدا كلما ظهر احد اباءنا ليعاقبنا على عدم الصلاة
المهم.... الساعة 4...نيسان بترول...ابيض...لم يسبق ان شاهده احد في المنطقة... يمخر عباب الفريج (يمخر عباب هذي بروحها تصلح تكون موضوع مستقل) مخفي شامل سوبر دارك...رنغات 18 ..مدعمية استرالية....تواير << بس خلاص!!
قال احد الزعماء....واللي ماكان اخوكم واحد منهم هذا شعنده يحوط ؟ شرايكم نفرٌه بحصى....؟ واثناء اختيارنا لخطة وزوايا الهجوم المباغت....توقف النيسان بالقرب من منزلنا....ونزل منه واحد بتاني (بليٌة)....ودق الجرس....
قلت في خاطريه شو هالمشكلة....؟ هذا شعنده...؟ واثناء تفكيري....
صرخ -نفس الزعيم- سر شوف شعنده يدقدق بابكم....قلت اوكي...وكالعادة سرت بروحي لألاقي قدري وحدي
اول ماوصلت عنده...وبأدب جم...قلت السلام عليكم خان...
فنظر لي..نظرة كادت ان تقتلني....ولكن ولله الحمد....
انقذني صوت ات من النافذة الخلفية...بس اللي استغرب منه ان الدرايش كانن هب تماتيك!!!
المهم ياني صوت يذبح.... لو سمحت شي فلل هنيه للإيجار....؟
يوم التفت صوب الصوت....شفت حرمة وبناتها....ياويل حالي انا....بصراحة اخوكم ذااااااااااااااااااب...وتحلل...وعرٌق
يت عيني في عين وحدة منهن....
ياويلي كانت احلاهن.....
وتميت اطالعها وانا مويٌم واظن والله العالم اني روٌنت بدون حاسية....كككككك ((وع ))
واللي يذبح انها ابتسمت...واستحت وصدت الصوب الثاني....الإبتسامة هذي كانت كافية انها تخلي اخوكم في (حيص بيص)... واثناء انهماكي...صرخت امها... حوووه....نحن نرمٌسك...؟
قلت: نعم....ومازال (التوييم مستمرا)
قالت: شي فلل للإيجار....؟
قلت في خاطريه: الاخت تظن اني سمسار سوري ولا شو موضوعها؟ المهم قلت لها...شي...شي...ودليتهن على فلة قريــــــــــــــــــــــــــبة من بيتنا
مع العلم انه شي فلة احسن عنها...بس انا مافيٌه اظرب خط كل يوم عشان اشوف (القلب)..!! ول ماسرع صارت القلب كككككككك
سألت وينها....؟
قلت: الحقوني...المهم (شغٌلت) السيكل وانطلقت... -السيكل كان BMX 16
عليه اريل...مسروق
ومزيننه بتيب ذهبي في الرنغات..بس يومها ماكنت حاط دبة مسافي....اخ يالقهر ولا الكشخة كانت بتكون 100%
... حاولت اشله ركز بس قلت ماله داعي لأن الطيحة بتكون فضيحة بكل المقاييس وقلت اررررركد وخل يومك يعدي على خير.... المهم...وصلتهم للفلة....وحوٌل البتاني بروحه!! وطبعا اخوكم ابو الاستهبال....تميت واقف...واتريا...
شوية....الا زعق البتاني خلاص...روووخ !!
روووخ !!! وين اروووخ.....؟ انا واقف عند بيتنا الثاني !! واشرت الى البيت المجاور... طبعا كذاب
المهم..... نزلن من السيارة..... وأول ماحطت ريلها...على الأرض حسيت انها داست على قلبي.............وبنظرة خاطفة وابتسامة لاتخلو من العذوبة...-طبعا من ورى امها والبتٌاني- رمقتني بنظرة...كانت اجمل ماحصل لي في حياتي....لأصعق بصوت امها.. (S) يا (S)....تعالي...بسرعة..... قلت اسمها (S)....فديـــــــــــــــت ال (ٍS) ياربي فديته... خخخ
المهم...عقب مالفن في البيت....وانا طبعا واقف انا والسيكل وبعض من قطاو الفريج....ظهرن...يا الهي...هاهي مرة اخرى....بكندورتها الزهرية وشيلتها السودا والأهم...ابتسامتها والتي لازالت على محياها.... فسألتني الأم مجددا.....كم ايجارها.... هذي صدق تفكرنيه سمسار!! اجبت ما عرف... خذي الرقم اللي موجود عاللوحة واسأليهم....وانا في خاطريه اقول والله لو ان الفلة مالتنا بأجرها ببلاش... فداء لعيون (ٍS) يعلني ماخلى منهن
ركبن السيارة وانا اتمتم بأغنية (ودعتها والليل لعبدالكريم عبدالقادر)... بصراحة ماكانت هذي الأغنية...كانت اغنية غيرها....بس اخاف تقولون هذا صدق
ومر يوم.....
والثاني....
والثالث.....
والرابع......
والسابع.......
وللحديث بقية..... اذا الله عطانا عمر.....
منقووول عن احد المنتدياات ..رووووعه ككككككككككالمهم ابي رايكم بالحب الاول ؟؟براايكم هل يزووول او لا ؟؟ممكن حد يحل مكاان الحب الاولي ؟؟؟
الثلاثاء مارس 27, 2007 1:09 am